Директор туралы ақпарат
Құдайбергенов Сарқыт Елекенұлы полимерлердің физикалық химия саласында дүниежүзіне белгілі ғалым, химия ғылымдарының докторы (1991), профессор (1994), ғылым мен техника саласында Қазақ КСРО Мемлекеттік сыйлығының лауреаты (1987), АТ Фондтың «Ғылымдағы жетістіктері үшін» сыйлығының лауреаты (1995), шетелде ең көп мақалалары жарияланған және оған көп сілтемелер жасалған қазақ авторы ретінде «Парасат» сыйлығының лауреаты (2010), Қ.И. Сәтбаев атындағы «Жаратылыстану ғылымдары саласындағы үздік ғылыми зерттеулері үшін» (2019), Қазақстан Республикасы білім және ғылым министрлігінің «Қазақстан Республикасы ғылымын дамытуға сіңірген еңбегі үшін» төсбелгісімен марапатталған (2012), «ҚазТрансОйл» АҚ ғылыми-техникалық орталығына 5 жыл» мерекелік медалімен (2003), Шәкәрім атындағы Семей университетінің құрметті профессоры ретінде «Шәкәрім университетіне сіңірген еңбегі үшін» медалімен (2011), «Сәтбаев университетіне 85 жыл» (2019), «Қаныш Сәтбаевтың 125-жылдық мерейтойы» медальдарымен (2024) марапатталды. Ғылым мен техниканың дамуына ерекше үлес қосқан ғалымдар мен мамандарға арналған Мемлекеттік ғылыми стипендияның иегері (2020). Қазақстан Республикасы Ғылым және жоғары білім министрлігі отандық ғылымды дамытуға қосқан елеулі үлесі үшін «Үздік ғалым» сыйлығын берді (2022).
Құдайбергенов С.Е. Стэнфорд университетінің ғалымдары жасаған жалпыға қолжетімді деректер қорының (https://doi.org/10.17632/btchxktzyw.2.) нәтижелеріне сай, дәйексөздері бойынша әлемнің жетекші ғалымдары арасында алғашқы 2%-ға кіреді және Web of Science Clarivate Analytics деректер базасына сәйкес полиамфолиттерді зерттеу саласында әлемдік көшбасшы болып табылады. Оған дәлел ретінде оның «Polyampholytes in Advanced Polymer Science and Emerging Technologies» (2024, CRC Press, АҚШ), «Polyampholytes: Synthesis, Characterization and Application” (2002, Kluwer Academic/Plenum Publishers, АҚШ), «Recent Advances in the Studying of Synthetic Polyampholytes in Solutions» (1999, Springer, Германия), “Polyampholytes” (2008, John Wiley @ Sons, АҚШ), «Polyampholytes: Past, Present, Perspectives» (2021, Қазақстан) атты ағылшын тіліндегі іргелі монографиялары мен шолу мақалалары мысал бола алады.
Оның ғылыми бағыты мұнай өнеркәсібінде, мұнай химиясында, катализде, нанотехнологияда, биотехнологияда, медицинада және қоршаған ортаны қорғауда арнайы мақсаттағы полимерлерді әзірлеу және оларды өндіріске енгізумен байланысты. Оның мұнай кен орындарына полимерлерді айдау технологиясы «Торғай Петролеум» АҚ -ның Құмкөл кен орнында 12 рет өндірістік-тәжірибелік сынақтарынан сәтті өтті.
С.Е. Құдайбергенов 500-ден астам ғылыми еңбектердің авторы, олардың ішінде қазақ, орыс, поляк және ағылшын тілдерінде жекеше және бірлесіп жазған 23 монография мен оқулықтар, 13 кітап тараулары, 39 шолу мақалалары және 168 ғылыми мақалалар ағылшын тілінде халықаралық рецензияланған журналдарда жарияланған. 228 мақала ССРО, СНГ, Ресей және Қазақстан журналдарында жарық көрген (Google Академия Sarkyt Kudaibergenov). Ол 44 авторлық куәліктердің және патенттердің иегері, Хирш индексі Scopus деректер базасы бойынша 26-ға тең.
Оның жетекшілігімен 1 докторлық, 7 кандидаттық және 5 PhD диссертациялар қорғалды. Алыс және жақын шетел ғалымдары мен мамандарының қатысуымен арнайы мақсаттағы полимерлер мәселелеріне арналған 8 Халықаралық семинарлар, конференциялар мен симпозиумдар ұйымдастырды.
С.Е. Құдайбергеновтің ғылыми-педагогикалық қызметі туралы мәліметтер Алматы энциклопедиясында (1996, 188 б.), «Қазақстан ғылымындағылар кімдер?» анықтамалығында (1999, 493 б.), сондай-ақ «Қазақ Энциклопедиясында» (2005, 6 т., 93 б.), «Жүзден жүйрік, мыңнан тұлпар» (ҚазҰУ, 2009 ж.), «Мұнай және газ» (2011, №3, 145 б.), «Қазақстан тарихы: мектепте оқыту» (2011, №5, 38-40 б.), «Macromolecular Chemistry and Physics” (2011, v.212, Issue 10, p. 1086-1087), «Біздің Элита» («Қазақ университеті», 2014 ж., 2 т., 298- 299 б.), Polymers for Advanced Technologies (2020, DOI: 10.1002/pat.5156), ҚазҰУ хабаршысы, Химия сериясы (2021, №1, 50-58 б.), Қарағанды университетінің хабаршысы, Химия сериясы (2021, № 2 (102), 4-7 б.) басқа да басылымдарда жарияланған.
